ماتقولش أنا لسة فاضللى
سنتين فى المخروبة دى... قول أنا عديت 4 سنين بحالهم.. و لسه واقف على رجلى.. فى
غيرك كتير كان نفسهم يعتبوها بس.. و ماقدروش :)
ماتقولش أنا إنهاردة حاسس
إنى مخنوق و مش طايق نفسى... قول أنا اللى كنت امبارح مهايبر حبتين :)
ما تقولش أنا متخلف... قول
أنا مختلف !! :)
لما تكون قاعد لوحدك فى
السكشن أو الكافيتيريا أو المترو... و مرة واحدة لقيت نفسك عايز تضحك و مش عارف
السبب... إضحك و مايهمكش... الناس هتبصلك و تقول مين العبيط ده... و إيه
يعنى يقولوا اللى يقولوه... ما هما برده نفس الناس اللى لو لقوك مِكشر هايقولولك ماتفوكّها شوية!! هما يعرفوا إيه عنك عشان يحكموا عليك... مش ممكن تبقى
الضحكة دي هدية من ربنا ليك عشان عارف إنك شايل فى قلبك هم كبير و عايزك تفوق من
الهم ده شوية.... إضحك!! بس مش عمّال على بطّال وحياتك ... مش
طالبة هبل أصلها :)
ماتبصش فى المراية إلا و انت مهيأ نفسك إنك هتشوف إنسان جميل ... بس ماتأفورش فى تخيلاتك أوى
عشان ماتتخضش :)
ماتقولش أنا تخنت أوى... قول
أنا هاشترى هدوم أوسع :)
لما تلاقى الدنيا بتمطر....
إنزل تحت المطرة و خد شاور...ماتخافش من مامتك لا تزعقلك على هدومك المبلولة... ماهى
كدة كدة بتزعق :)
هات كتاب بتحبه و إقراه
تانى... هتلاقى نفسك شايف الأحداث بشكل مختلف عن آخر مرة قريته... ساعتها هتحس إنك
مبسوط أوى و نفسك تحكى للناس كلها عن عبقريتك التحليلية :)
لو حسيت إنك وحيد و مالكش
أصحاب... اقعد جنب مراية :)
لو عايز تفرح بجد... ضَحّك
اللى حواليك :)
و لما تلاقى نفسك
متضايق... متنكدش عاللى حواليك...عاند نفسك و إضحك... و ضحكهم معاك بردو :)
ما انت لو عايز تفرح
نفسك... هتفرح نفسك.... و ساعتها أى حاجة بسيطة تقدرتخليك مبسوط... و بعدين يعنى هو النكد هيروح فين.. ماهو عارف عنوانك و مش هيسيبك... إنت بس ماتستعجلهوش :)
ماتحاولش تقلد حد... اختلافك سر تميزك :)
و ماتبقاش نمطى و ممل... فاجأ نفسك كل يوم بجانب جديد من شخصيتك و اتعرف عليه :)
أول ما تصحى الصبح.. إحمد ربنا إنك صحيت... و إحمد ربنا إنه خلقك كده زى ما انت... حب نفسك... هاتفرق معاك أوى :)
بص للسما... غمض عينيك... ابتسم... و قول الحمد لله :)
اقعدوا بالعافية :* ^_^
سمر أحمد السعدنى
ماتحاولش تقلد حد... اختلافك سر تميزك :)
و ماتبقاش نمطى و ممل... فاجأ نفسك كل يوم بجانب جديد من شخصيتك و اتعرف عليه :)
أول ما تصحى الصبح.. إحمد ربنا إنك صحيت... و إحمد ربنا إنه خلقك كده زى ما انت... حب نفسك... هاتفرق معاك أوى :)
بص للسما... غمض عينيك... ابتسم... و قول الحمد لله :)
اقعدوا بالعافية :* ^_^
سمر أحمد السعدنى
No comments:
Post a Comment